Amencer, acuarela por Ana B. , 3º ESO C

O noso amor é mencer, tamén solpor,

escuridá da noite e luz do día,

luceiro escintilante que nos guía

a un universo senlleiro e tentador.

Non é soidade o amor, melancolía,

brilante, sobrehumano resprandor:

¡é berro fondo, calado, aterrador

que, urxentemente, esixe compañía!

O verdadeiro amor sempre é mencer,

claridade que nace porque si

na impresión total do noso ser.

Non teño outro degaro, mais querer,

que vivir, miña amiga, perto a ti

e, ó teu lado, soñar e envellecer.

De Poemas da labarada estremecida, 1985

Recita Rosalía F., 1º ESO C

“Matrix of Love” de Vladimir Kush.

Horacio Silva: Ulises e o seu can, 2007

ÍTACA

Cando olhei surdir, entre o azul

incrível do céu e mais do mar,

a illa mítica de Ítaca,

co seu lombo de égua ou arroaz,

quedei estantio, trasvirado

a mundos de viages e aventuras

vividos na infáncia já lonjana.

Lembrei a Penélope e a sua teia.

Evoquei tamén ao cauto Ulisses

e a firme fidelidade do seu cam.

De s´bito envolveu-me e possuiu-me

o arraigado amor á minha tribo.

E sentim um desejo inevitável

de regresar para sempre e non sair

da ilha melancólica que eu som.

de  Oráculos para cavalinhos-do-demo, (1986).

Lectura: Manuel R., 3º ESO B

Yaiza e Emma, de 1º A, recitan a Manuel María.

Nós, unha vez, tiveramos un can:

Petiso Mochilo, un nome raro.

Pronuncialo dábanos reparo,

pois nomes como estes non se dan.

Mais tiñamos perfectamente claro

que o Petiso pertencía ao noso clan;

démoslle,co noso amor, casa e amparo

e partimos con el o propio pan.

Ledo, pequerrecho, consentido,

Petiso, vulgar e preguiceiro,

foi compañeiro bo e agradecido.

O Petiso xa é po, cinza de olvido,

mais en min vai total e verdadeiro

o  tristísimo son do seu ladrido!

 De  Sonetos á Casa de Hortas